Azərbaycan Milli Elmlər Akademiyası akademik Z.M.Bünyadov adına Şərqşünaslıq İnstitutunun dövri elmi nəşri olan “Şərq araşdırmaları” elmi-nəzəri juranlının 1-ci sayı işıq üzü görüb.

Ali Attestasiya Komissiyasının elmi nəşrlər siyahısına daxil olan jurnalın baş redaktoru Şərqşünaslıq İnstitutunun baş direktoru akademik Gövhər Baxşəliyevadır. Nəşrin redaksiya heyətinə Azərbaycanla yanaşı Rusiya, Rumıniya, Türkiyə,İraq və Gürcüstandan alimlər daxildir.

Jurnalda Şərq filologiyası, tarixi və fəlsəfəsi, ilahiyyat, Şərq ölkələrinin iqtisadiyyatı və  siyasi elmlər sahələrinə aid 29 elmi məqalə dərc olunub. Bu sırada “XIX əsrin sonu-XX əsrin əvvəllərində Türkiyədə ictimai-siyasi dəyişikliklərin ədəbi prosesə təsiri və yeni ədəbiyyatın əsas mərhələləri”, “Tənzimatdan II məşrutiyyətə qədər olan dövrdə mətbuat ətrafında yaranan ədəbiyyat mühiti”, “Aşıq Veysəl şeirlərində milliliyin təzahür formaları”, “Sufilikdə məqam və hal anlayışı”, “Türkiyə romanında qadın imzası”, “Müasir fəlsəfə və plüralizmin ünsiyyət mədəniyyətinə dair”, “Peyğəmbərin hədislərində etik normalar” və s. məqalələri qeyd etmək olar.

Jurnalın ikinci sayı üçün məqalə qəbuluna başlanılıb.